هديتي لكم بالعيد. . . . خاچية..وايام باص صيفية

ا.د.ضياء واجد المهندس

سردت لي خاچية قصة من أيامها الماضية قائلة:
اكو باص ريم قديمة طالع من البصرة للنجف بشهر آب (بالعشرة الي تموع البسمار بالباب) ، مقبط فول ،وصل للكوفة ،واحد اشرله يريد يروح للنجف . السايق گال خطية ، خل اوگفله ظهرية والدنيا حارة والمسافة قريبة، خل يوگف بالممر . تعرفون اكو ناس تخلي غراضهه بالممر مال الريم، واكو عجوز عدهه دجاجة وديچ رابطتهن رجل برجل ومخليتهن بالممر ، هذا العبري اول ماصعد چفص ببطن الدجاجة ميدري خطية ، العجوز شالت روحهه ودگتهه بالگاع ،وصاحت: اليوم انعل والديك الله اكبر هسه تخسرهه.. الرجال خطيه استحه وارتبك ، واحد من العبرية گله اذبحهه خطيه دتأذه وليش اتروح حرامات ، فأخذ سچينة من واحد وذبح الدجاجة ، وظلت الدجاجة اتطفر بالممر، ودمرت الناس دم، وكلهه گامت تصيح عليه. واحد من الگاعدين گله: هي اثول ،غير تگص رجليهه حتى لتگمز مو تدمرنه من وراك ،الله ليوفقك .. الرجال مچذب خبر ،دنگ يگص رجلين الدجاجة، ونسه الديچ مربوط وياهه رجل برجل، وگام صاحبنه وگص رجل من الدجاجة ورجل من الديچ .. العجوز طفرتله شايطة: الله اكبر على راسك ،الله ينتقم منك ،سويت الخسارة خسارتين ..
صاح عليه شايب كاعد بالاخير گله: منعول الوالدين ، صعدت ويانه من الكوفه للنجف لعبت بينه لعب، چا لوصاعد ويانه من البصرة للنجف چان شسويت بينه ، چان تذبحنه كلنه ؟

#رباط السالفه الجماعة الفوگ لو حاكمينا من الخمسينات چان هسه العراق منقرض ولاحگ الديناصورات !!

أ.د.ضياء واجد المهندس
مجلس الخبراء العراقي