خاچية .. و النصيحة البـــابوية ..

ا.د.ضياء واجد المهندس..

تقول خاچية: قبل فتــــرة واحد من كرايبنه ؛؛أثول و اطرم و اطرش؛؛ دعمه قطـــــار ومرده مـرد ، فـ مـن خاليناه بالگبر ؛ آجه السيـــــد فوگ راسه يلقنه ؛ ويگله :إسمع يافلان ، إسمع ياهـــــذا ، إسمع ياأيها العبد ..
ـ أبو الميت واگف بصف السيد گله : عمي متگلي إنت شلزگـت ؛؛؛ إسمع ما إسمع ، هو قطار شكبره شگده ماسمعه ، تريده يسمعك إنت .. تستطرد خاچية : گمش السيد اخو الميت الچبير وگله: عمي ؛اخوك صغير ، عليگ تختمله القران ، وتچي كل خميس تقراله أدعية ..تكول أبوه زهگ على السيد وگله : اخوه أخرس واطرش وفوگاها ما يفتهم ،، سيدنا رحمات والديك انت كل خميس من تمر لأهلك تقرالهم أدعية ، مر على ابننا..
ولا هســــــه بابا الفاتيكان ، يدعوا ساسة العـــــراق الى التصدي لآفــــة الفساد !
يمعــــــود بابا ،إنت هم مثل كرابتنه وماأدري شلونك ، بأرضنا نـزل ٢٠٠ نبـي ، وست أئمة معصومين مدفونين بيها ، وعدنه ست الاف مرقد وضريح ومقام ومزار ، وعدنه أكبر حوزة علمية ، وكل هاي المقدسات وماوگفت بعين ذولي النكرية. جاي انت هســــه تالي وكت تريدهم يتوبون ويتصــــدون لآفـــــة الفساد ؟ ربي..لا تفضحنا بساستنه الحثالة..و يلطشون من البابا سرواله ..لو يبگون نعاله.. و نصير سالفة للنشالة.. سألت خاچية عن يأسها من حكامنا في اصلاحهم.. اجابتني : العام من رحت للحج ، چانت وياي نائبة ومسؤولة ، اني اشتغلت الشيطان ضرب بالمصيادة حتى گمشوني الأمن السعودي وگلولي شنو انتي(سيدة الحجارة ) تضربين الاسرائيليين !!!!!؟؟؟، وصاحباتي يسولفن ، وحده تگول : لا اتحارش بالشيطان ولا يتحارش بيه ، والثانية تكول : هو شبع حجار من الحجاج ،تفرق اضربه ب كم حچارة !!! .. .. .. .. البروفيسور د ضياء واجد المهندس. مجلس الخبراء العراقي